Paštafažol

 

Za 4 peršone potribno je:
- 1/2 kg fažola (najbolje o vrsti kok i to mladi)
- paket kranjskih i/ili 20 dkg pancete oli bunceka, a more i rebarca
- sol 
- konšerve na vrj noža
- petrsimul (nekoliko listića)
- 1 špica luka
- 1/2 kapule
- žlica brašna
- slanina (za pešt)
- goveđa kocka
- šaka šubjoti oli čikarica riži
- biljno ulje (za zapršku)
Priprema:
Fažol pomočit u teču vode, neka tako stoji cilu noć. Ujutro ga prokuvat u čistoj vodi i onda procidit. Obavezno prolit 1. vodu jerbo š njon bi fažol teško pa na štumik. U novu vodu stavit fažol i dodat sol, malo konšerve, suvo meso i zadnjih po ure o' ove kuvancije ča će durat uru i po do dvi dodat pešt. Narafski, ako se gre na varijantu sa kobasicama, one će bit prije gotove (oko 20 minuti), pa ih triba izvadit iz teče da se ne raspadnu; š njima nazad u teču kad je sve gotovo, da se zgriju, e... Poza tega dodat šubjote oli riž, zapršku i goveđu kocku. Neka kuva još dvadeset minuti. Nima kužinavanja brez kušanja i zaradi tega kušaj kroza svo vrime i po potribi dodaji sol i vodu. Sutradan je uvik bolje, vengo oni dan kad je skuvano, e... Guštajte!
----------------------------------------------
E, a žunta, a? Ma evo i žunta, e...
Pešt - luk, petrsimul i bokuniće slanine stuč sataron i na ti način dobit gustu smjesu ča se zove pešt.
Zaprška - 1/2 kapule nasickat i malo zažutit u pršuli na biljno ulje, dodat žlicu brašna i kad sve skupa dovoljno požuti (ne smi izgorit) jemate zapršku.